«İlim ha`m ja`miyet» jurnalı

Ha`zirgi waqıtta kadrlar tayarlaw ha`m bilimlendiriw tarawındag`ı ma`mleket siyasatın a`melge asırıw, ulıwma bilimlendiriw sisteması ushın joqarı mag`lıwmatlı qa`nigeler tayarlaw, ruwxıy bay, milliy g`a`rezsizlik ideyası ha`m ulıwmainsanıylıq qa`driyatlar negizinde ta`rbiyalang`an erkin, do`retiwshi insandı jetilistiriw-baslı maqsetimiz.

İnstitut professor-oqıtıwshıları, izleniwshiler, aspirantlar, magistrantlar ha`m studentlerdin` ilimiy-izertlew na`tiyjeleri boyınsha mektep ta`limin rawajlandırıw ma`mleketlik ulıwmamilliy da`stu`rinin` a`melge asırılıwı ma`selesine, ekologiya, hayal-qızlardın` ilimdegi ornı mashqalalarına bag`ıshlang`an Xalıq aralıq ha`m Respublikalıq ilimiy-a`meliy konferentsiyalar, seminarlar, treningler, debatlar o`tkerildi.

İnstitutta ilimiy da`rejeli pedagog kadrlar tayarlaw O`zbekstan Respublikası İlim ha`m texnika komiteti ta`repinen berilgen litsenziya negizinde a`melge asırılıp, institut aspiranturasında ta`lim alıp atırg`an Qaraqalpaq tili, Qaraqalpaq a`debiyatı, Ulıwma pedagogika, pedagogika ha`m ta`lim tariyxı, Sotsial filosofiya, O`zbekstan tariyxı, Botanika qa`nigelikleri boyınsha 1 6 aspirant ilimiy- kandidatlıq dissertatsiyaları boyınsha jumıs alıp barmaqta.

Respublikamızdın` xalıq aralıq abıroyının` o`sip barıwı – sırt eller menen ken` ko`lemli birge islesiw baylanısların ornatıp, bul baylanıslardı elede rawajlandırıwg`a imkaniyat jarattı. Bilimlendiriw tarawında xalıq aralıq baylanıslardı jolg`a qoyıw, rawajlang`an ma`mleketler ta`jiriybesin u`yreniw, olar a`meliyatındag`ı aldın`g`ı pedagogikalıq ta`jiriybelerdi ma`mleketimiz sharayatları ha`m imkaniyatların esapqa alg`an halda qollanıw, shet el investitsiyaların bilimlendiriw sistemasında paydalanıw, ta`lim-ta`rbiya na`tiyjeliligin asırıw bilimlendiriw orınlarının` bazasın rawajlandırıwg`a qaratılmaqta. Sol maqsette ko`plegen professor-oqıtıwshılar sırt ellerde ta`jiriybe arttırıw kurslarında oqıp keldi.

İnstitutta ilimiy-izertlew jumısların maqsetli alıp barıwdı jolg`a qoyıw, ilimge qızıg`ıwshan` ziyrek studentler ha`m magistrantlarg`a ilimiy basshılardı biriktiriw, olardın` izertlew bag`darların belgilew, pitkeriw qa`nigelik jumısı ha`m magistrlik dissertatsiya temaların kandidatlıq dissertatsiya jumısı da`rejesine ko`teriw, respublikamızdag`ı joqarı oqıw orınları ha`m ilim-izertlew institutları, sırt el oqıw orınları menen birgelikte islesiwdi sho`lkemlestiriw, O`zbekstan Respublikası İlim ha`m texnologiyalar Orayının` ilimiy grant proektleri tan`lawına qatnasıw ha`m sol tiykarda, ilim-izertlew jumısların orınlap mektep, akademiyalıq litsey ha`m ka`sip-o`ner kolledjleri ushın jan`a oqıw a`debiyatların jaratıw boyınsha is-ilajlar a`melge asırılmaqta.

İnstitutımızda profesor-oqıtıwshılar ha`m student jaslardın` ilim ha`m bilimge bolg`an qızıg`ıwshılıg`ın ele de teren`lestiriw ja`ne olardag`ı izleniwshilikti jetilistiriw maqsetinde 1992-jılı Respublikalıq ko`lemdegi «Qaraqalpaqstan mug`allimi» ilimiy jurnalı sho`lkemlestirildi. Bu`gingi ku`ni bul jurnal «İlim ha`m ja`miyet» ataması menen 4 ( qaraqalpaq, o`zbek, rus ha`m inglis) tilde baspadan shıg`ıwı arqalı do`retiwshilik ha`reketin dawam etip atır.